Kung pipiliing mahimlay sa aking mga yakap
Ay aking ikagagalak, tulad ng buwang magbabantay sa
mga bituin sa dagat ng karimlan
Habang ika'y payapang mamamasyal sa katahimikang
kalakip ng katiting na liwanag, ay kaligayahan kong maiduyan ka sa'king balintataw
Hanggang dumating ang umagang hudyat ng muli mong pag-alpas
Bukas-palad ka'ng palalayain nang walang pagdaramdam o pagpiglas
'Di maghahangad sa iyong paglingon o pagtanaw, kung kapalit ay kapirasong kaligayahang sa piling ko'y tila laging kulang
At pagsapit ng dapithapon, muling maghihintay
Sakaling mapagod, naising tumahan sa mga bisig na handa kang yakapin
Batid mang pagkakataon ay hiram, hangganan ay
tiyak, oras ay may bilang
‘Pagkat may espasyong laging nakalaan para sa iyo, at iyo lamang
Kahit nakatakda na ang paulit-ulit mong paglikas at pamamaalam
Sa sandaling sumikat muli, sinag ng kinabukasan
Iguguhit na lamang, mga bakas ng kahapon at ngayong nariyan ka at narito ako
Dahil ang pagdating at paglisan mo'y bahagi na ng siklong walang katapusang aabangan at hahabulin ko
Katumbas ng saglit na maramdamang mayroong ikaw at ako
Makaaasa kang may hintayang lagi kang tatanggapin
Habang ang pinto ng himlayang nais mo'y, di ka pa kayang pagbuksan at kanlungin
Dahil batid namang ang hantungan sa piling ko ay di
siyang iyong kailangan at hangarin
